Түркістан қаласында ұйымдастырылған «Аналарға қолдау - балаларға мүмкіндік» атты шара отбасы мүшелерінің дамуына, олардың бір-бірімен үйлесімді қарым-қатынас орнатуына бағытталған, деп хабарлайды Qaz365.kz.
Түркістан қаласындағы Оқушылар сарайының директоры Индира Сарқытқызының сөзінше орталықта ұйымдастырылған «Аналарға қолдау - балаларға мүмкіндік» шарасы отбасы мүшелерінің дамуына, олардың бір-бірімен үйлесімді қарым-қатынас орнатуына бағытталған маңызды әлеуметтік бастама. Бұл бастаманың табысты жүзеге асуы – Түркістан қаласының ғана емес, бүкіл қоғамның дамуына, тұрақтылығына және өркендеуіне тың серпін береді.
«Бүгінгі күні отбасының дамуы - қоғамның тұрақтылығы мен өркендеуі үшін аса маңызды мәселе. Сондықтан «Аналарға қолдау - балаларға мүмкіндік» атты шараның ұйымдастырылуы ерекше құнды деп ойлаймын. Бұл бастама аналарға өз білімдерін арттыруға, жаңа дағдылар мен мүмкіндіктерге қол жеткізуге жағдай жасайды. Сол арқылы олар өз отбасыларының әлеуетін арттырып, балаларға жақсы өмірлік негіз қалауға мүмкіндік алады. Сонымен қатар, балалар үшін ашылған түрлі үйірмелер олардың шығармашылық қабілетін дамытуға, жеке тұлға ретінде қалыптасуына септігін тигізеді. Оқушылар сарайы ретінде біз осындай жобаларды қолдап, балалар мен аналардың жан-жақты дамуына бағытталған іс-шараларды ұйымдастыруға дайынбыз. Өйткені отбасындағы әрбір мықты ана мен шабытты бала - елдің болашағының негізі. Отбасының берекесі мен тұрақтылығы көбінесе ананың қолдауына, оның дамуына және рухани-эмоциялық жағдайына байланысты. «Аналарға қолдау – балаларға мүмкіндік» атты шара – дәл осы маңызды аспектіні назарға алған әлеуметтік бастама», дейді орталық директоры.
Бұл іс-шараның маңыздылығы бірнеше басты бағытта көрінеді. Аналарға арналған жаңа курстар олардың кәсіби біліктілігін, өзін-өзі дамытуын және психологиялық тұрақтылығын күшейтеді. Өз кезегінде, мықты және сенімді ана – отбасының негізі. Оның дамуы отбасының барлық мүшелеріне оң әсер етеді. Балаларға арналған үйірмелер олардың шығармашылық, интеллектуалдық және әлеуметтік қабілеттерін дамытуға бағытталған.