2025 жылдың 1 қазанындағы мәлімет бойынша, Қазақстанда 2 миллион 510 мың зейнеткер бар.
Еңбек және халықты әлеуметтік қорғау министрлігі еліміздегі зейнетақы көлемі мен зейнеткерлер санына қатысты жаңа мәліметтерді ұсынды, деп хабарлайды Qaz365.kz.
2025 жылдың 1 қазанындағы мәлімет бойынша, Қазақстанда 2 миллион 510 мың зейнеткер бар.
Жыл басынан бері республикалық бюджеттен зейнетақы төлемдеріне жалпы 3 триллион 158,1 миллиард теңге бөлінген. Оның ішінде 1 триллион 22,1 миллиард теңге – базалық зейнетақыға, ал 2 триллион 136 миллиард теңге ынтымақты зейнетақыға жұмсалған.
Зейнетақының орташа жиынтық мөлшері 142 810 теңгені құрайды. Оның ішінде ынтымақты зейнетақы – 95 249 теңге, базалық зейнетақы – 47 561 теңге.
Министрлік 2018 жылдың 1 шілдесінен бастап базалық зейнетақы әр азаматқа жеке есептелетінін еске салды. Бұл кезде адамның зейнетақы жүйесіне қатысу өтілі ескеріледі.
Зейнетақы өтіліне 1998 жылдың 1 қаңтарына дейінгі еңбек өтілі және міндетті зейнетақы жарналары (МЗЖ) аударылған кезеңдер кіреді.
Егер азаматтың жүйеге қатысу өтілі 10 жыл немесе одан аз болса, базалық зейнетақы тұрақты өмір сүру минимумының 70%-ына тең болады.
Ал әрбір қосымша жыл үшін төлем 2%-ға өседі:
20 жыл еңбек өтілі барларға – тұрақты минимумның 90%-ы,
30 жыл және одан көп еңбек өтілі барларға – максималды 110% мөлшерінде төленеді.
Сондай-ақ министрлік егер бір айда Бірыңғай жинақтаушы зейнетақы қорына (БЖЗҚ) бірнеше жарна түссе, ол бір айлық еңбек өтілі ретінде есептелетінін атап өтті.
Айта кетейік, зейнетақы төлемдерінің көлемі адамның 1998 жылғы 1 қаңтарға дейінгі еңбек өтіліне (кемінде 6 ай болуы тиіс) және зейнетке шыққанға дейінгі орташа айлық табысына байланысты есептеледі.