Қазақстанның әйгілі ақыны, жазушысы және қоғам қайраткері Олжас Сүлейменов биыл Нобельдің бейбітшілік сыйлығына кандидат ретінде ұсынылды. Бұл туралы «Байтақ» жасылдар партиясы мәлім етті, деп хабарлайды Qaz365.kz.
Партияның мәліметінше, шешім Алматыда өткен V конференцияда қабылданған. Партия төрағасы Азаматхан Әміртаев Сүлейменовтің кандидатурасын Нобель комитетіне ресми түрде ұсынғанын жариялаған.
Бастаманы қолдаушылар оны «Қазақстан ғана емес, бүкіл әлем үшін қажырлы қызмет атқарған тұлғаның еңбегіне берілген жоғары баға» деп сипаттады.
Сүлейменовтің Нобель сыйлығына ұсынылуына оның «Невада–Семей» антиядролық қозғалысын құрғандағы және ядролық сынақтарды тоқтатудағы тарихи рөлі түрткі болған. Оның бастамалары нәтижесінде Семей полигоны жабылып, Қазақстанның халықаралық бастамалары арқасында шетелдердегі төрт бірдей ірі ядролық полигонның жұмысы тоқтатылған.
Әміртаевтың сөзінше, Сүлейменов «қазақ руханиятының тірегі әрі әлемге бейбітшілік үнін жеткізген қайраткер». Сондықтан оның Нобель сыйлығына ұсынылуын «тарихи әділеттілік» деп атады.
Партия өкілдері бұл қадам Қазақстанның халықаралық аренадағы абыройын арттырып, елдің бейбіт саясатқа адалдығын көрсетеді деп сенеді.
Олжас Сүлейменов – халық жазушысы, Социалистік Еңбек Ері, Абай атындағы мемлекеттік сыйлықтың лауреаты, «Невада–Семей» қозғалысының негізін қалаушы, поэзия мен ғылыми еңбектердің авторы.