Қазақстанда соңғы жылдары ең жылдам қымбаттаған салалар – медицина, ақылы қызметтер және азық-түлік, деп хабарлайды Qaz365.kz Energyprom деректеріне сілтеме жасап.
Талдауға сәйкес, 2020 жылдың желтоқсанынан 2025 жылдың желтоқсанына дейін елдегі тауарлар мен қызметтердің жалпы бағасы шамамен 75 пайызға өскен. Ең жоғары өсім азық-түлік сегментінде тіркелді – бағалар 79 пайызға қымбаттаған. Ақылы қызметтер 73,3 пайызға, азық-түлікке жатпайтын тауарлар 70 пайызға өскен.
Әсіресе медицина саласындағы баға айтарлықтай артқан – 94,1 пайыз. Тұрмыстық тауарлар мен қызметтер 90 пайызға, коммуналдық қызметтер 80 пайызға қымбаттаған. Киім бағасы 65,3 пайызға, аяқ киім 76,7 пайызға өскен. Стоматологиялық қызметтер 75,8 пайызға қымбаттаған. Жеке көлікке кететін шығындар 68,5 пайызға, қоғамдық көлік 38,3 пайызға артқан. Білім беру орталықтарының қызметі 42,1 пайызға, балалар фастфуды 76,8 пайызға, дәрі-дәрмек бағасы 61 пайызға өскен.
Өңірлер бойынша ең жоғары баға өсімі Маңғыстау облысында – 83 пайыз. Одан кейін Астана (81,2%), Ақмола облысы (81,1%) және Қарағанды облысы (80,3%) тұр. Ал ең төмен өсім Алматы облысында (64,7%) және Жамбыл облысында (69,3%) байқалған. Сарапшылар мұны импортқа тәуелділік деңгейі, тарифтік саясат және халық тұтынуының құрылымымен байланыстырады.
Демалысқа кететін шығындар да едәуір артқан. 2020 жылмен салыстырғанда Түркияға турсапарлар 3,1 есе, Дубайға сапарлар шамамен 3 есе қымбаттаған. Қазақстандағы демалыс орындарының бағасы 66,7 пайызға өскен.
Бұған дейін Қазақстан Республикасының Ұлттық банкі инфляция деңгейінің жоғары болуына байланысты базалық мөлшерлемені 18 пайыз деңгейінде сақтаған. Реттеуші басшысы Тимур Сүлейменов те «Бәйтерек» холдингінің ірі көлемдегі несиелері квазифискалдық тәуекелдер бақылауға алынбаса, инфляциялық қысымды күшейтуі мүмкін екенін ескерткен.