Депутат көрші елге экспортталып жатқан газды Қазақстандағы аудан-ауылдарға пайдалануға болатынын айтты
Мәжіліс депутаты Нұртай Сәбильянов Абай облысына газ жеткізу мәселесін көтерді. Оның айтуынша, көршілес Жетісу облысынан Үшаралға дейін газ тартылған, ал Абай облысына газ жеткізуге мүмкіндік бар, деп хабарлайды Qaz365.kz.
Өткен жылдың күзінде «Талдықорған – Үшарал» магистралды газ құбыры жоспарланған мерзімінен бір жыл төрт ай бұрын пайдалануға берілгені жайлы ақпарат жарияланған еді. Енді 130 мыңнан астам тұрғын көгілдір отынды тезірек елді мекендерге беруін күтіп отыр. Депутат осы қаладан 100 шақырым жердегі Абай облысындағы елді мекендерде газ әлі тартылмағанын атап өтті.
«Үшаралмен Абай облысының арасы небәрі 100 шақырым. Неге Үшаралдан ары қарай Абай облысына газ тартпасқа? Шығыс Қазақстан облысын да қарастырайық. Зайсан ауданына газ шығарылады. Бірақ 10 жылдан астам уақыт бойы Зайсан ауданындағы 10 шақты елді мекен әлі газбен қамтылмаған. Газ құбыры аудан арқылы өтеді, бірақ одан кейін көрші мемлекетке экспортқа жіберіледі. Сол газды елді мекендерді қамтамасыз етуге пайдалануға болады», — деді депутат.
Сәбильянов сонымен қатар мемлекет басшысының үкіметтің кеңейтілген отырысында Абай, Ұлытау және Алматы облыстарының инфрақұрылымын дамытуға қолдау көрсету керектігін тапсырғанын еске салды. Ол бұл тапсырма аясында елді мекендерді дамыту үшін үкімет тарапынан қаржы бөлінуі қажет екенін атап өтті.
Еске сала кетсек, мәжіліс депутаты Бақытжан Базарбек жазалау әдісін ғана қолдану мас болып көлік жүргізетіндерді тоқтату үшін жеткіліксіз екенін айтты