Қазақстандықтар өздерінің зейнетақы жинақтарына иелік етуде бұрынғыдан да үлкен еркіндікке ие болуы мүмкін. Мәжіліс депутаты Асхат Аймағамбетов азаматтардың жеке басқарушы компанияларға сеніп тапсыра алатын жинақ үлесін қазіргі 50 пайыздан 75 пайызға дейін арттыру туралы бастама көтерді, деп хабарлайды Qaz365.kz.
Парламентарийдің пікірінше, салымшылар тек Ұлттық банктің есептерін бақылап қана қоймай, болашақ зейнетақысының табыстылығына белсенді әсер етуі тиіс. Бұл ретте ешқандай мәжбүрлеу болмайды: тәуекелге барғысы келмейтіндер үшін Ұлттық банк бұрынғыша «сенімді айлақ» болып қала береді.
«Қазір сізде бірнеше таңдау бар. Сіз: "Мен ештеңеге тиіскім келмейді, ақшамды Ұлттық банк басқарсын" деуіңізге болады. Бұл — қалыпты жағдай. Бірақ екінші шешім де бар. Біз шекті деңгейді 75 пайызға дейін көтергіміз келеді. Бұл — сіздің ақшаңыз, шешімді де өзіңіз қабылдауыңыз керек», – деп мәлімдеді Асхат Аймағамбетов.
Реформаның басты жаңалығы – инвестициялық стратегияны таңдау мүмкіндігі. Депутат салымшыларға өз портфелін жеке компания ішінде әртараптандыруға рұқсат беруді ұсынды. Мысалы, соманың бір бөлігін жоғары табыс әкелетін «тәуекелді» активтерге, ал қалғанын капиталды қорғайтын «консервативті» бағалы қағаздарға бөлуге болады.
«Мәселен, сіздің 5 миллион теңгеңіз бар делік. Оны банкке (басқарушы компанияға) бердіңіз. Сізде тәуекелдерді хеджирлеу мүмкіндігі болғаны дұрыс: 2 миллионын табысы жоғары, бірақ тәуекелі бар активтерге, ал қалған 3 миллионын консервативті қағаздарға салуды өзіңіз шешесіз. Осылайша азаматтарға өз жинақтарын басқаруға көбірек мүмкіндік берер едік», – деп түсіндірді мәжілісмен.
Аймағамбетов соңғы жылдары Ұлттық банктің басқару көрсеткіштері «жаман емес» екенін, алайда жеке компаниялармен (Halyk Finance және т.б.) бәсекелестік салымшылар үшін тиімдірек шарттар туғызатынын атап өтті.