Ақтөбе қаласының халқының саны 600 мың тұрғынға толды. Мұндай ресми деректі бүгін Қазақстан Республикасы Ұлттық статистика бюросының Ақтөбе облысы бойынша департаменті жариялады, деп хабарлайды Qaz365.kz Ақтөбе қаласы әкімдігінің баспасөз қызметіне сілтеме жасап.
Айтулы оқиғаның басты кейіпкері
Ақтөбенің 600 мыңыншы тұрғыны – Мансұр есімді нәресте. Ол қаламыздың 8-ші шағын ауданында тұратын Құрмашевтар отбасында дүниеге келді. Қала әкімі Азамат Бекет осы қуанышты сәтте жас отбасының шаңырағына сыйлығымен арнайы барып, ақжарма тілегін білдірді.
Құрмашевтар әулеті – еңбекқор Ақтөбенің нағыз үлгісі. Отағасы Жасұлан – телекоммуникация саласының маманы, ал анасы Айсұлу – жас дәрігер. Кішкентай Мансұр – бұл әулеттің тұңғышы әрі көп жыл зауытта еңбек еткен Амангелді Құрмашевтің алғашқы немересі.
Кездесу өте жылы әрі ерекше мейірлі өтті. Нәрестенің әжесі Алуаш апай ізгі дәстүрмен «ырым болсын» деп, қала әкіміне Мансұрдың иткөйлегін сыйға тартты. Бұл – жақсылықтың нышаны, қаламызға береке мен ырыс әкелсін деген ақ тілек еді.
Қаламен бірге өсеміз
Қала әкімі Азамат Бекет халық санының қарқынды өсуі — Ақтөбенің дамуы мен тартымдылығының басты көрсеткіші екенін атап өтті.
«Қаламыз соңғы жылдары тек сан жағынан емес, ауқымы жағынан да едәуір өсті. Жаңа үйлер бой көтеріп, инфрақұрылым жақсаруда. Біздің басты мақсатымыз — әрбір тұрғынға жайлы орта қалыптастыру. Әрине, біз үшін әлеуметтік нысандарды салу — ең басты басымдық», — деді әкім.
Қала басшысының айтуынша, бала санының артуына байланысты білім беру саласына ерекше көңіл бөлінуде. Бүгінде Ақтөбеде 121 мектеп (оның 8-і соңғы біржарым жылда ашылды) және 245 балабақша жұмыс істеп тұр. Жаңа әлеуметтік нысандардың құрылысы алдағы уақытта да жалғаса бермек.
Статистика департаментінің басшысы Айбек Ғалымжанов 600-мыңыншы тұрғынды анықтау үшін қатаң демографиялық әдістемеге сүйенгенін түсіндірді.
«Біз туу, қайтыс болу және көші-қон процестерін сағат сайын қадағалап отырдық. Осы деректер негізінде қала халқының саны 600 мыңға жеткен сәтте дүниеге келген нәресте анықталды», — деді ол.
Құрмашевтар әулетін және барша ақтөбелікті осы тарихи сәтпен құттықтаймыз! Ақтөбеміз көркейе берсін, әр шаңырақта сәбидің сыңғырлаған күлкісі естілсін!