Алматыда арнайы айып тұрақтарына 11 мыңнан астам электросамокат шығарылды. Бұл жөнінде қалалық Жол қозғалысын ұйымдастыру және жолаушылар көлігі басқармасының басшысы Ержан Диханбаев мәлімдеді, деп хабарлайды Qaz365.kz.
Оның айтуынша, 27 наурыздан бастап қала көшелеріне төрт сервистің 22,5 мың самокаты орналастырылған болса, қазір оның тең жартысына жуығы тәркіленген.
Басқарма өкілдері самокаттардың қала қозғалысы үшін күрделі мәселе болып қалып отырғанын алға тартады. Негізгі қиындық – олардың жылдамдығын бақылаудың қиындығы мен GPS жүйесіндегі 30 метрлік қателік. Бұл құрылғылардың орналасқан жерін дәл анықтауға және арнайы аймақтардағы жылдамдық шектеулерін дұрыс реттеуге кедергі келтіруде. Массивті эвакуация қала билігінің бұл мәселені қауіпсіздік үшін елеулі қатер деп санап отырғанын көрсетеді.
Жағдайды реттеу үшін 2026 жылы Алматыда самокаттарға арналған 5 мыңға жуық арнайы тұрақ салу және 55 шақырым веложол төсеу жоспарланған. Сондай-ақ тұрғындардың заң бұзушылықтар бойынша шағым түсіруі үшін арнайы Telegram-бот іске қосылмақ. BES.media жүргізген сауалнама нәтижесі көрсеткендей, алматылық жаяу жүргіншілердің басым бөлігі самокатшылардың болжап болмайтын әрекеттері мен жоғары жылдамдығына байланысты өздерін қауіпсіз сезінбейтіндерін айтқан.