Тағы екі көл тазартылып жатыр
Алматыда үш қалалық көлді тазарту жалғасып жатыр. Сайран, Қарасу және Әуежай көлдері осы жылдың наурыз айынан бастап қоқыс пен лайдан тазартылып жатыр. Көл түбін құрғату үшін Есентай, Үлкен Алматы және Кіші Алматы өзендерінің ағысы тоқтатылды, деп хабарлайды Qaz365.kz тілшісі қала әкімдігінің баспасөз қызметіне сілтеме жасап.
“Сайран су қоймасының түбі соңғы 50 жылда алғаш рет механикалық тазартылуда. Арна мен жағалауды тазартуға 4 экскаватор мен 30 самосвал жұмылдырылған. Аумағы 60 га, жұмыс басталғалы 140 мың м3 қоқыс пен лай шығарылды. Тазалау жұмыстары жақын күндері аяқталады”, – делінген хабарламада.
Сонымен қатар, Үлкен Алматы өзенінің №1 тұндырғыштан Абай даңғылына дейінгі бөлігі, Есентай өзенінің жекелеген аумағы және Кіші Алматы өзенінің Әл-Фараби даңғылынан Сәтбаев көшесіне дейінгі аумақ санитарлық тазартудан өтеді.
Механикалық тазартудың негізгі мақсаты – биологиялық үдерістерді сақтау және су айдындарының экологиялық тепе-теңдігін қалпына келтіру үшін жағдай жасау.