Оның айтуынша, ол үшін бір заңның жүзеге асуы жеткілікті
Айтыскер ақын, Мәжіліс депутаты Ринат Зайытов «Abay live» арнасына берген сұхбатында қазақ тілі 3 жылдың ішінде толық мемлекеттік тілге айналатынын айтты, деп хабарлайды Qaz365.kz.
Бағдарлама жүргізушісі «Қазақ тілі алдағы 10-20 жылда мемлекеттік тіл болып қалады дегенге сенбеймін» деп айтады. Бұған депутат келіспеді.
«Мен сенемін. Үш жылда бәрі орнына келеді. Ол үшін бір заңды жұмыс істеткізіп жіберсек болғаны. Жарты жолына келіп қалдық. Бұл іспен Қазыбек Иса бастаған бір топ депутаттар айналысып жатыр. Бұрын Қазыбек Иса жалғыз еді, қазір Парламенттің жартысы қолдау көрсете бастады», – дейді Ринат Зайытов.
Оның айтуынша, депутаттар бұл мәселе бойынша премьер-министрдің әлеуметтік мәселелер блогына жауап беретін орынбасары Алтай Көлгіновпен кездеспекші болған көрінеді. Алайда үлгермей қалған.
«Сосын орнына Тамара Дүйсенова тағайындалғанда Қазыбек Иса ағамыз айтты. «Осындай жоспарымыз болған. Заңнаманың ережелерін Көлгіновке бергенбіз. Енді сізге де ұсынамыз. Осыны қаперіңізде ұстаңыз» деді. Ол келісті. Біз енді асықтырамыз. Сондықтан алаңдамаңыздар», – деді депутат.