Азаматтық авиация комитеті жағдайдың қалай болғанын хабарлады
23 қаңтарда сағат 00.10-да Алматыда жер сілкінісі болды, ол әуе қозғалысын басқарудың автоматтандырылған жүйесінің «мұнарасында» айтарлықтай сезілді. Бұл туралы Азаматтық авиация комитетінде мәлімдеді, деп хабарлайды Qaz365.kz.
«Әуеайлақ ауданында қонуға келе жатқан 5 әуе кемесі болды, оның ішінде 1 әуе кемесі қонды, 4 әуе кемесі жер сілкінісі туралы хабардар етілді және әуеайлақ ауданында күту ұйымдастырылды. Аэродромды басқару орталығында әуе қозғалысын басқару 20 минутқа созылды. Одан әрі жерасты дүмпулері тоқтаған соң, аэродромды басқару орталығы қайтадан жұмысын бастады», – делінген хабарламада.
Қонуы тиіс 4 ұшақтың бірі – Астана-Алматы бағытындағы Air Astana КС-856 рейсінің ұшағы Түркістанның қосалқы аэродромына қонды. Қалған үшеуі еш қиындықсыз Алматы әуежайына қонды.
«Сағат 00:39-дан бастап әуежай штаттық режимде жұмыс істей бастады. Қосалқы аэродромға қонған КС-856 рейсі Түркістаннан 02.32-де Алматыға ұшып, 03.34-те сәтті қонды», – делінген хабарламада.