Өзбек спортшыларына жанкүйер болғанын айтты
Париж Олимпиадасында Өзбекстан рекорд жаңартты. Көрші елдің құрамасы қазірдің өзінде бес алтын жеңіп алды, деп хабарлайды Qaz365.kz.
Бүгін түнде бокстан Асахуджа Муйдинхужаев (71 келі) пен Лазизбек Муллажонов (92 келі) топ жарды
Муйдинхужаев финалда мексикалық боксшы Марко Алонсо Верде Альварестен басым түссе, Муллажонов болса, Әзірбайжан атынан өнер көрсететін кубалық Лорен Берто Альфонсо Домингесті жеңді.
Бұған дейін дзюдошы қыз Диера Келдиерова топ жарса, таэквондошы Улугбек Рашидов пен боксшы Хасанбой Дусматов екі дүркін Олимпиада чемпионы атанған.
Соңғы екеуін Қазақстан Президенті Қасым-Жомарт Тоқаев құттықтады. Ол Өзбекстан президенті Шавкат Мирзиеёвпен кездесуде өзбек спортшыларына жанкүйер болғанын айтты.
«Сізді құттықтаймын! Хасанбой Дусматов пен Ұлықбек Рашидов Олимпиаданың екі дүркін чемпионы болып отыр. Біз бәріміз жанкүйер болдық», – деді Тоқаев.
Қазіргі кезде Өзбекстан бес алтын, үш қоламен 14-орында тұр. Бүгін тағы бірнеше алтын бұйыруы мүмкін.
Бокстан Абдумалик Халоков (57 келі) мен Баходир Жалолов (+92 келі) финалдағы кездесулерін өткізеді.
Сондай-ақ еркін күрестен 74 келідегі балуаны Разамбек Жамалов да бүгін алтынға таласады.
Ауыр атлетикадан Акбар Джураев екі дүркін Олимпиада чемпионы болғысы келеді.