Әлімханұлы өз салмағындағы чемпиондарға арнап желіде жазба қалдырды
Жақында ғана жаңазеландиялық қарсыласын жеңген Жәнібек Әлімханұлы чемпиондарды жекпе-жекке шақырды, деп хабарлайды Qaz365.kz.
Екі тұжырым бойынша әлем чемпионы Жәнібек Әлімханұлы өз салмағындағы чемпиондарға арнап желіде жазба қалдырды.
«Кез келген жерде, кез келген боксшымен жұдырықтасуға біз әрқашан дайын болғанбыз, қазір де дайынбыз. Қазақ стилін тарихқа қашап жазамыз бұйыртса! Мен үшін үлкен жекпе-жектер тек чемпиондық жекпе-жек. Бізге чемпиондар керек! Төрт титул керек! Чемпиондар қашса, қорықса олар чемпиондар емес! Ал ақша үшін бокстасса ол спортшы емес, бизнесмен. Мен әлі де келесі жекпе-жегім Адамес не Ларамен болады деп үміттенемін. Командам қазір үлкен келіссөздер жүргізіп жатыр. Егер чемпиондар келіспесе, екі титулды қайта қорғаймыз.
Сондай-ақ ол келесі жекпе-жегінің уақыты туралы айтты.
«Бұйырса келесі жекпе-жегім ақпан айында өтеді деп жоспарлануда! Чемпиондық жекпе-жек болады немесе WBO міндеттеген қарсыласпен өнер көрсетеміз. Маған сенім артып, жанкүйерлік жасап жүрген барша ағайынға көп рақмет. Екі титул қолда, екеуі жолда! Құдай қаласа ертелі кеш 4 титулды елге алып келемін», – деді Әлімханұлы.
Айта кетейік, Жәнібек Аустралияның Сидней қаласында өткен жекпе-жекте Андрей Михайловичті (21-1, 13 КО) 9 раундта қарсыласын техникалық нокаутқа жіберген еді.