Ол 3 жыл бойы өз міндеттемелерін орындамай келген
Ақмола облысында алимент бойынша борышкер қылмыстық жауапкершілікке тартылды, деп хабарлайды Qaz365.kz.
Бұл туралы ҚР Бас прокуратурасының баспасөз қызметі мәлімдеді.
“Зеренді ауданы прокуратурасының бастамасымен кәмелетке толмаған балаларды асырау үшін алимент төлеуден қасақана жалтарғаны үшін қылмыстық іс тіркелді. Мәселен, алимент төлеуге нақты мүмкіндігі бар азамат «Ж» 3 жыл бойы өз міндеттемелерін орындау шараларын қолданбай, әрекетсіз болды. Қарыз шамамен 3 миллион теңгені құрады. Алайда, әкімшілік жауапкершілікке тартылғаннан кейін тиісті қорытынды жасамай, борышкер бейресми жұмысқа орналасу арқылы өзінің нақты табысын жасыра отырып, кәмелетке толмаған балаларды асырауға қаражат төлеуден жалтаруды жалғастырды. Сот үкімімен борышкер ҚК-нің 139-бабы бойынша кінәлі деп танылып, оған 300 сағат қоғамдық жұмыстарға тарту түріндегі жаза тағайындалды”, – делінген прокуратура хабарламасында.
Еске сала кетейік, алименттік міндеттерді орындамағаны үшін азаматтарға қылмыстық жауапкершілік көзделген. Кәмелетке толмағандардың құқықтарын қорғау прокуратураның тұрақты бақылауында.