Іс Астанада тергеліп жатыр
«СҚ-Фармация» қызметкерлері сеніп тапсырылған мүлікті иемдену және талан-таражға салу бабымен күдікке ілінді, деп хабарлайды Qaz365.kz.
Астана қаласы бойынша Экономикалық тергеу департаменті «СҚ-Фармация» ЖШС қызметкерлеріне қатысты Қылмыстық кодекстің 189-бабы 4-бөлігі бойынша ұрлық фактісі бойынша сотқа дейінгі тергеу жүргізіп жатыр.
«Басқа ақпарат Қылмыстық-процестік кодекстің 201-бабының талаптарына сәйкес жария етуге жатпайды», – деп хабарлады агенттік баспасөз қызметі.
Бұған дейін Мәжіліс депутаты Бақытжан Базарбек «СҚ-Фармация» қызметіне қатысты Бас прокуратураға өтініш түсірген болатын. Өтініш беру туралы шешім ол Жоғары аудиторлық палатаның тексерісі қорытындысынан кейін қабылданған. Депутаттың айтуынша, мемлекетке елеулі зиян келтірген заңбұзушылықтар анықталған.
«СҚ-Фармация» және фармацевтика саласындағы өзге де субъектілер бойынша мәлімдемені оның әріптесі, депутат Мұрат Әбенов те қолдады.
Айта кетейік, Қылмыстық кодекстің 189-бабы 4-бөлігі – бөтеннің ақшасын қылмыстық топтың аса ірі көлемде иемденуі немесе талан-таражға салуы – үшін 7 жылдан 12 жылға дейін бас бостандығынан айыру және мүлкін тәркілеу жазасын көздейді.