Қазақстан фермерлері үшін жаңа мүмкіндіктер ашылды
Қостанайдағы локализация орталығының базасында John Deere өздігінен жүретін, тіркемелі және аспалы ауыл шаруашылығы техникасының өндірісі ресми түрде іске қосылды, деп хабарлайды Qaz365.kz.
Қостанайдағы John Deere өндірісі
Жаңа өндірістің іске қосылуы – Қазақстандағы машина жасау саласының дамуындағы және аграрлық секторға озық технологияларды енгізудегі маңызды қадам. John Deere – ауыл шаруашылығы техникасын өндіруде әлемдік көшбасшы әрі оның Қазақстанда жергілікті өндіріске айналуы сала үшін стратегиялық маңызға ие.
Өндіріс AGROMASH зауытының локализация орталығының базасында жүзеге асады. Бұл кәсіпорын – Қазақстандағы ауыл шаруашылығы техникасын өндіретін ең ірі өндірістік алаңдардың бірі, ол жоғары өндірістік стандарттар мен техникалық қолдауды қамтамасыз етеді.
– Елде жүргізіліп жатқан саяси және экономикалық реформалардың арқасында біз әлемдік деңгейдегі John Deere сынды америкалық ауыл шаруашылығы техникасы брендінің өндірісін жергілікті жерде ұйымдастыру мүмкіндігіне ие болдық. Бұл – тарихи сәт. Осындай жоғары технологиялық жобалар арқылы біз тек жаңа жұмыс орындарын құрып, инновациялық технологияларды игеріп қана қоймай, сонымен қатар қазақстандықтардың инженерлік ойлау қабілетін дамытамыз, – деді AGROMASH зауытының президенті Динара Шүкіжанова.
Қазақстан фермерлері үшін артықшылықтар
Қостанайда John Deere техникасының өндірісін іске қосу қазақстандық фермерлерге бірқатар жаңа мүмкіндіктер ұсынады:
- Қазақстанның климаттық және жер жағдайына бейімделген ауыл шаруашылығы техникасының кеңейтілген ассортименті пайда болады;
- Мемлекеттік қолдау шараларын ескере отырып, қолжетімді бағамен техника сатып алу мүмкіндігі туады.
Қазақстандағы John Deere брендінің ресми өкілі – Eurasia Group компаниясы. Жоба аясында олар енді қазақстандық өндірістегі ауыл шаруашылығы техникасын сату, сервистік қызмет көрсету және аграрлық секторға цифрлық шешімдерді енгізу жұмыстарын жалғастырады.
Сонымен қатар, бұл жоба ел экономикасына қосымша ресурстар тартуды, білім беру саласын дамытуды, сондай-ақ ауыл шаруашылығы саласына қажетті мамандарды даярлауды көздейді. Атап айтқанда, агрономдар, инженерлер, механизаторлар және IT-мамандар даярланады. Алдағы бес жыл ішінде елде үш заманға сай сервистік орталық салынады. Бұл орталықтар цифрлық технологияларды енгізу мен агроөнеркәсіптік кешеннің тиімділігін арттыруға арналған негізгі алаңдар болмақ.
Өз кезегінде, AGROMASH зауыты өнеркәсіптік кооперацияны кеңейту аясында басқа да батыс брендтерін жергілікті өндіріске айналдыруды жалғастырады. Бұл Қазақстан нарығындағы отандық өндірістегі ауыл шаруашылығы техникасының үлесін айтарлықтай арттыруға мүмкіндік береді.
Бүгінде локализация орталығында ауыл шаруашылығы техникасы мен оның компоненттері әлемдік жетекші брендтермен бірге өндірілуде. Олардың қатарында John Deere, Lovol, Deutz-Fahr, Кировец, ГОМСЕЛЬМАШ, AMAZONE, CLAAS және басқа да ірі өндірушілер бар.
Осылайша, Қостанай облысы Қазақстандағы ауыл шаруашылығы техникасын өндіру бойынша ең ірі кластер мәртебесін нығайта отырып, елдің индустриялық және аграрлық секторындағы басты орталықтардың біріне айналып келеді.
