Ол табандылықпен, толық беріле жұмыс істеу, жомарттықпен инвестиция салу және дамудың әр кезеңін терең ой елегінен өткізу қажеттігін атап өтті
Telegram негізін қалаушы Павел Дуров 2025 жылдың 2 қазанында Астанада өткен Digital Bridge халықаралық форумында сөз сөйледі, деп хабарлайды Qaz365.kz.
Дуровтың айтуынша, көптеген ықпалды әрі табысты адамдар оған Қазақстанға келіп, өмірлік жарын табу ниетімен бөлісетінін жеткізген.
«Өкінішке қарай, менің мақсатым ол емес. Мен мұнда жасанды интеллект туралы айтуға келдім. Бұл – қоғам құрылымын түбегейлі өзгертетін өте кедергілей алатын (обструктивный) элемент. Мұнда екі түрлі көзқараспен қарауға болады: біріншісі – қорқыныш тұрғысынан, екіншісі – сенім тұрғысынан. Бизнес көшбасшыларымен, үкімет өкілдерімен және университеттермен, соның ішінде Қазақстанда да сөйлесе жүріп, мен Қазақстанның бұл үдеріске үміт пен шабыт тұрғысынан қарайтынын байқадым. Әрине, көптеген сын-қатерлер туады, бірақ оларды жасанды интеллекттің көмегімен шешуге болады. Бұл – бәрі үшін молшылық дәуіріне айналатын алтын дәуір болмақ», – деді ол.
Ол табанды еңбек етуге, толықтай берілуге, жомарт инвестиция салуға және дамудың әр кезеңін терең ой елегінен өткізуге шақырды.
«Бір жыл бұрын біз алғашқы өңірлік кеңсені Қазақстанда ашқан едік. Қазір оның нәтижелерін көріп отырғанымызға қуаныштымыз. Бүгін мен Alem.Ai ғимаратында жасанды интеллект зертханасын ашатынымызды мақтанышпен жариялаймын. Алғашқы жоба Telegram мен Қазақстанның суперкомпьютерлік кластерінің бірлескен жұмысы болмақ. Ол жасанды интеллект министрлігінің қолдауымен дәл осы жерде іске қосылады. Бұл қандай жоба? Соңғы бірнеше айда біз Telegram-да блокчейн мен жасанды интеллекттің тоғысындағы жаңа технологияны әзірлеп келеміз. Бұл технология децентрализденген компьютерлік жүйе арқылы бір миллиардтан астам адамға жасанды интеллект функцияларын қолдануға мүмкіндік береді», – деді Павел Дуров.
Іс-шараға Қазақстан Президенті Қасым-Жомарт Тоқаев қатысты.
