Қазақстанда жаңа Салық кодексінің нормаларына байланысты такси және жеткізу қызметтерінің құны айтарлықтай өсуі мүмкін. Премьер-министрдің орынбасары Серік Жұманғариннің төрағалығымен өткен Жобалық кеңсе отырысында бизнес өкілдері мен мемлекеттік органдар арасында интернет-агрегаторлардың салық агенті мәртебесіне қатысты қызу пікірталас болды, деп хабарлайды Qaz365.kz.
«Атамекен» ұлттық кәсіпкерлер палатасының мәліметінше, жаңа заңнамада P2P (төлемдер тікелей пайдаланушылар арасында жүретін) моделі үшін бұрын қолданылған жеңілдіктер алып тасталған. Енді барлық платформа өз бетінше жұмыс істейтін жүргізушілер мен курьерлер үшін салық агенті болуға міндеттеледі. ҰКП төрағасының орынбасары Тимур Жаркенов бұл талап әлеуметтік төлемдер (жылына шамамен 4%) мен банктік комиссиялар есебінен қызмет бағасының қымбаттауына әкелетінін ескертті.
Алайда Қаржы министрлігі бұл ұстаныммен келіспейді. Вице-министр Ержан Біржанов мемлекеттің ақша ағындарын толық цифрландыру бағытынан таймайтынын жеткізді. Оның айтуынша, ескі жүйеге оралу – ашықтықты төмендетіп, салықтан жалтаруға жол береді. Қазірдің өзінде еліміздегі 33 оператордың 27-сі салық агенті режимінде табысты жұмыс істеп жатыр.
Еңбек және халықты әлеуметтік қорғау министрлігі де ағымдағы тәртіпті сақтауды қолдап отыр. Платформалық жұмыспен қамту жүйесі іске қосылғаннан бері тек зейнетақы жарналарының өзі 3,7 млрд теңгені құраған. Үкімет бизнеске түсетін салмақты жеңілдетудің балама жолдарын қарастыруды тапсырды, бірақ салықтық әкімшілендірудің негізгі принциптері өзгеріссіз қалуы мүмкін.
