Мұнда балалардың қосымша білім алуына барлық жағдайлар жасалған
Шымкент қаласының Тұран шағынауданында Оқушылар сарайы қолданысқа берілді, деп хабарлайды Qaz365.kz Шымкент қаласы әкімінің баспасөз қызметіне сілтеме жасап.
Жалпы ауданы 9 881,9 шаршы метр құрайтын үш қабатты ғимарат 1 ауысымда 500 орынға лайықталған.
Заманауи талапқа сай бой көтерген жаңа нысанды аралап көрген қала әкімі Ғабит Сыздықбеков өскелең ұрпақтың сапалы білім, саналы тәрбие алуына қолайлы жағдай жасау басым бағыттардың бірі екенін атап өтті. Сондай-ақ жауаптыларға жастардың бос уақытын тиімді ұйымдастыруды тапсырды.
Айта кету керек, жаңа қосымша білім беру мекемесінде 7 жастан 18 жасқа дейінгі балалардың қосымша білім алуына барлық жағдайлар жасалған.
Оқушылар үшін бассейн, интерактивті кітапхана, керамика үйірмесі, 3D-модельдеу және Lego кабинеттері қарастырылған. Биотехнологиялық және гуманитарлық блоктарда балалардың шығармашылық қабілеттерін дамытуға ықпал ететін фотостудия, бейнестудия және журналистика үйірмелері орналасқан.
