Оқушыларының қорытынды емтихандары 29 мамыр-16 маусымға жоспарланған
Қазақстанда 2024-2025 оқу жылы аяқталуда. Биыл 3,9 млн-нан астам оқушы оқу жылын қорытындылайды, деп хабарлайды Qaz365.kz.
Бұл туралы ҚР Үкіметінің отырысында Оқу-ағарту министрі Ғани Бейсембаев оқу жылының аяқталуы және оған байланысты жоспарланған іс-шаралар туралы айтқан болатын.
“Биылғы оқу жылын «Білімім – Отаныма» бірыңғай сынып сағатымен қорытындылау жоспарлануда. 11-сынып түлектеріне арналған салтанатты шараны әр мектептің педагогикалық кеңесінің шешіміне сәйкес «Мектебім, саған мың алғыс!» тақырыбында 23-24 мамырда өткізу ұсынылады. Аттестаттарды тапсыру рәсімі 18-20 маусым аралығында өтеді. 9 және 11 сынып оқушыларының қорытынды емтихандары 29 мамыр-16 маусымға жоспарланған. Сондай-ақ 9-сынып бітіретін 364 мың оқушы мектепте оқуды жалғастыру немесе колледжге түсу туралы шешім қабылдайды”, – деді министр.
Еске сала кетейік, биылғы жылы 11-сыныпты 217 мың түлек аяқтап, жоғары білімга қадам басады.
