Бұл жайт қоғамда қызу талқыға түсті.
Назарбаев Университетінен шақырту алғанына қарамастан, түнгі уақытта әскерге шақыру қағазынсыз ұсталып, әскери комиссариатқа жеткізілген 18 жастағы Нұрсұлтан Табынбайдың жағдайы әлеуметтік желі мен ата-аналар арасында үлкен алаңдаушылық туғызды.
Qaz365.kz жариялаған ақпараттан кейін Foundation бағдарламасы түлектерінің ата-аналары Назарбаев Университетінің президенті Вакар Ахмадтың атына ресми хат жолдады. Онда олар балалары дайындық бағдарламасын аяқтап, емтихан тапсырып, мемлекеттік грант ұтып алғаннан кейін де көктемгі әскерге шақырылудан қорғалмағанын айтып, алаңдаушылық білдірген.
Ата-аналардың сөзінше, студенттерді қабылдау туралы бұйрық тек тамыз айында шығарылады, яғни соған дейін балаларда ресми түрде «студент» мәртебесі болмайды, тиісінше заң жүзінде әскерге шақыруға ешкім тыйым сала алмайды. Бұған грант ұтып алып, оқу ақысының төленгені де кедергі емес. Осыған байланысты хат авторлары өз ұсыныстарын жеткізген: грант туралы хабарлама алған күннен бастап студенттік мәртебені мойындау немесе тамыз айына дейін шегеруге рұқсат беру.
Нұрсұлтан Табынбайдың отбасы оның 5 маусым күні кешке ұсталғанын, телефоны тәркіленіп, ұзақ уақыт бойы оның қайда екені айтылмағанын хабарлады. Қарындасының сөзіне қарағанда, әскери комиссариат нақты жауап бермеген, ал қызметкерлер: «Әбден шаршаттыңыздар» деп жауап беруден бас тартқан.
Qaz365.kz редакциясы бұл оқиға бойынша Қорғаныс министрлігіне ресми сұрау жолдады. Министрліктің жауабында азаматтарды әскерге шақыру ел Конституциясы мен заңдарына толық сәйкес жүргізілетіні айтылған.
Әскери қызмет уақытын кейінге шегеру жоғары оқу орындары мен колледждердің күндізгі бөлім студенттеріне ғана беріледі. Назарбаев Университеті жанындағы дайындық курстары заңда көзделген ресми білім беру бағдарламасына жатпайды, сондықтан олар кейінге қалдыру құқығын бере алмайды. Аталған азаматтың шақырылуы заң аясында жүргізілді, – деп мәлімдеді министрлік.
Әлеуметтік желіде дәл осындай жолмен – шақыру қағазынсыз ұсталған басқа жастар туралы да хабарламалар таралып жатыр. Университетке түскен талапкерлерді қабылдау туралы бұйрық шыққанға дейін олардың құқықтары қалай қорғалатыны жөніндегі мәселе әлі де ашық күйінде қалып отыр.
