Енді порталда төрт түрлі мамандықты төрт түрлі оқу орнында таңдауға болады
Биылдан бастап eGov арқылы колледжге құжат тапсыру кезінде енді жатақхана немесе тегін тамақ сұратуға болады, деп хабарлайды Qaz365.kz.
Бұл туралы ҚР «Ұлттық ақпараттық технологиялар» орталығының баспасөз қызметі мәлімдеп отыр.
“Өтініш беру кезінде бірден жатақхана немесе тегін тамақ беру қажеттігін көрсетуге болады. Сондай-ақ, әскерден келген азаматтар тиісті құжатты тіркей алады. Бұдан бөлек, жүйе таңдалған параметрлерге — аймақ, оқу тілі, бағыт және мамандыққа — сәйкес келетін колледждердің тізімін автоматты түрде ұсынады. Сондай-ақ “Серпін” бағдарламасына қатысатын өңірлерден шыққан ауыл мектептерінің түлектеріне арналған жеке сүзгі іске қосылды», – делінген орталық хабарламасында.
Өтініш бір рет қана беріледі, бірақ төрт түрлі мамандықты төрт түрлі оқу орнында таңдауға болады. Қосылатын құжаттар көлемі 5 Мб-тан аспауы тиіс. Мемлекеттік қызмет 3–5 жұмыс күні ішінде көрсетіледі.
Еске сала кетейік, колледждерге 9 және 11-сынып негізінде қабылдау:
Жалпы мамандықтар бойынша – 25 маусымнан 22 тамызға дейін;
Шығармашылық мамандықтар бойынша – 25 маусымнан 20 шілдеге дейін;
Педагогикалық және медициналық мамандықтар бойынша – 25 маусымнан 10 тамызға дейін жүргізіледі.
2025/2026 оқу жылында 150 мың талапкерді мемлекеттік грант бойынша қабылдау жоспарлануда.
