30 тамыз – Конституция күні қарсаңында Түркістан облысы, Сауран ауданында «Келешек мектептері» жобасы аясында Сұлтанбек Қожанов атындағы 300 орындық жалпы білім беретін жаңа мектеп пайдалануға берілді, деп хабарлайды Qaz365.kz.
Ашылу рәсіміне облыс әкімі Нұралхан Көшеров қатысып, тұрғындарды Ата Заңның 30 жылдық мерейтойымен және жаңа оқу жылының басталуымен құттықтады.
«Жаңа оқу жылында 1-сыныпқа 48 мыңнан астам оқушы қабылданды. Жыл сайын мектеп табалдырығын аттайтын балалардың көбеюі бізге үлкен жауапкершілік жүктейді. Сауран ауданында 3 «Келешек» мектебі іске қосылып отыр. Бұл – Үшқайық, Жалаңтөс, Теке ауыл тұрғындары үшін үлкен қуаныш. Бұл – балаларымыздың болашағына жасалған нақты қолдау», – деді аймақ басшысы.
Жаңа білім ордасында заманауи жабдықталған сыныптар, 115 орындық акт залы, спорт және еңбек шеберханалары, асхана мен кітапхана, медициналық пункт бар. Мектеп аумағы – 2 гектар, бейнебақылау жүйесімен толық қамтылған. Құрылысты «Samruk-Kazyna Construction» АҚ тапсырмасымен «Ныш-Ер» ЖШС жүргізді.
«Келешек мектептері» – Мемлекет басшысы Қасым-Жомарт Тоқаевтың бастамасымен қолға алынған ұлттық жоба. Бұл – ел болашағына бағытталған маңызды инвестиция. Түркістан облысында жоба аясында 29 мектептің құрылысы басталды. Оның ішінде өткен оқу жылында 13 мектеп пайдалануға берілсе, биылғы жаңа оқу жылында тағы 16 мектеп ашылмақ.
