Әл-Фараби атындағы Қазақ ұлттық университетінде BASF Mining Solutions техникалық қызмет зертханасының ашылу салтанаты өтті. Бұл – Орталық Азияның тау-кен-металлургиялық саласын дамытуға бағытталған ауқымды ғылыми жоба, деп хабарлайды Qaz365.kz.
Шараға ҚазҰУ Басқарма мүшесі, академиялық мәселелер бойынша проректор Алина Галеева, «BASF Орталық Азия» ЖШС бас директоры, «Тау-кен өнеркәсібіне арналған шешімдер» бағытының жетекшісі Ростислав Камкин, BASF компаниясының EMEA және Орталық Азия аймағы бойынша аймақтық бизнес-директоры Мильяна Спасич, сондай-ақ серіктестер мен бизнес-қауымдастық өкілдері қатысты.
Зертхана минералды шикізатты өңдеу және гидрометаллургия саласында қолданбалы ғылыми зерттеулер жүргізуге, сонымен қатар өндіріс тиімділігін арттыратын инновациялық шешімдер әзірлеуге арналған.
Проректор Алина Галеева бұл бастаманы ғылым мен өндіріс арасындағы стратегиялық серіктестіктің нақты көрінісі ретінде атап өтті:
«Бұл серіктестік студенттер мен жас ғалымдарға практикалық әрі инновациялық жобаларға қатысуға жол ашады. Химия және химиялық технология факультетінің студенттері осы зертханада алған білімдерін тәжірибеде қолдана отырып, құнды тәжірибе жинайды».
«BASF Орталық Азия» ЖШС бас директоры Ростислав Камкин зертхананың ашылуы компания миссиясының маңызды бөлігі екенін айтты:
«Біз тұрақты болашақ үшін химия жасаймыз. Қазақстанда зертхана ашу – серіктестерге сапалы техникалық қолдау көрсетудің және жас мамандарды даярлаудың маңызды қадамы. Бұл біздің тұрақты даму саласындағы мақсаттарымызға толық сәйкес келеді».
Жаңа зертхана Lupromin, Luproset, Luprofroth, LIX, Alamine, Aliquat, LixTRA сияқты реагенттерді сынауға мүмкіндік беретін заманауи жабдықтармен қамтылған. Мұнда минералдарды тиімді бөліп алу, шығындарды азайту және экологиялық қауіпсіздікті қамтамасыз етуге арналған шешімдер дайындалады.
BASF Central Asia мен ҚазҰУ арасындағы серіктестік аясында студенттер үшін өндірістік тәжірибелер ұйымдастырылып, бірлескен дәрістер мен ғылыми жобалар іске аспақ. Бұл тек университеттің емес, бүкіл өңірдің тау-кен өндірісінің дамуына оң ықпал етпек.
