Ол теңгенің күрт құнсыздануына себеп болатын алғышарттар жоқ деп отыр.
Премьер-министр Олжас Бектенов теңге бағамының тұрақтылығы мен ұлттық валютаның әлсіреу ықтималдығы жөнінде журналистердің сауалдарына жауап берді, деп хабарлайды Qaz365.kz.
Үкімет басшысының айтуынша, ұлттық валютаның бағамы толықтай нарықтық тетіктерге сүйене отырып қалыптасады және қазіргі уақытта теңгенің күрт құнсыздануына себеп болатын қандай да бір алғышарттар байқалмайды.
Бағам бізде тек нарықтық факторлар негізінде қалыптасады. Ұлттық банк тарапынан оған араласу жасалып жатқан жоқ. Қазіргі таңда өзіміздің де, беделді сарапшылардың да пікіріне сүйенсек, теңгенің айтарлықтай әлсіреуіне негіз жоқ, - деді премьер-министр.
Сондай-ақ ол биылғы күзде доллар бағамы 600 теңгеге жетеді деген болжамдарды орынсыз деп есептейтінін жеткізді. Оның сөзінше, 2026 жылға арналған республикалық бюджетті әзірлеу кезінде үкімет 60 долларлық мұнай бағасына негізделген базалық сценарийді басшылыққа алған. Бұл жағдайда доллар бағамы 540 теңге деңгейінде қарастырылған.
Бұл - біздің негізгі, яғни базалық сценарийіміз. Егер мұнай бағасы 50 долларға дейін төмендейтін болса, пессимистік сценарий іске қосылады, онда басқа механизмдер қарастырылған. Алайда қазіргі ахуалға сәйкес, біз базалық сценарийдің ең шынайы нұсқа екеніне сенеміз. Сондықтан да девальвация немесе теңгенің күрт құнсыздануын күтпейміз, - деп қорытындылады Олжас Бектенов.
