Түркістан облысы, Сауран ауданы Оранғай ауылында Қазақстан Республикасы Конституциясының 30 жылдығы қарсаңында 90 орындық арнаулы әлеуметтік қызмет көрсететін «Шұғыла» оңалту орталығы пайдалануға берілді, деп хабарлайды Qaz365.kz.
Әлеуметтік нысанның ашылу салтанатына Түркістан облысының әкімі Нұралхан Көшеров қатысып, жергілікті тұрғындарды құттықтап, бұл игі бастаманың маңыздылығын атап өтті.
Жаңа орталықта 3 пен 18 жас аралығындағы тірек-қимыл аппараты бұзылған мүмкіндігі шектеулі балалар ем қабылдайды. Нысанның жалпы құны – 3 млрд 121,7 млн теңге. Мұнда бір мезетте 90 балаға арнаулы әлеуметтік көмек көрсетіледі:
60-ы стационарлық негізде,
30-ы жартылай стационарлық негізде.
Орталық әлеуметтік-тұрмыстық, медициналық, психологиялық, еңбек, педагогикалық, мәдени, құқықтық және әлеуметтік-экономикалық бағыттар бойынша қызмет көрсетеді.
«Сіздерді Конституцияның 30 жылдығымен шын жүректен құттықтаймын! Осы мереке қарсаңында бірнеше әлеуметтік нысан іске қосылуда. Мемлекет басшысы Қасым-Жомарт Тоқаев Жолдауында: “Біз ерекше қажеттіліктері бар адамдар үшін бірдей мүмкіндік жасауға міндеттіміз”, деген болатын. «Шұғыла» орталығы – балалардың болашағына деген үміт, ата-аналарға сенім, қоғамдағы тең мүмкіндіктің көрінісі. Жыл соңына дейін осындай тағы екі орталық ашылады. Әр баланың арманына қанат бітіріп, өміріне жарық сыйлау – біздің басты міндетіміз», – деді Нұралхан Көшеров.
Орталық заманауи құрал-жабдықтармен толық қамтамасыз етілген. Мұнда:
прессотерапия, қысқа толқынды терапия аппараттары,
массаж және физиотерапия кабинеттері,
монтессори, сенсорлық және психомоторика бөлмелері,
спорт және акт залдары, оқу кабинеттері бар.
Сыртқы алаңдарда кіші футбол алаңы, воркаут аймағы және жазғы сахна қарастырылған. Орталыққа облыс әкімінің атынан пианино сыйға тартылды.
Жыл соңына дейін Түркістан және Сарыағаш қалаларында 100 орындық «Аутизм орталықтары» ашылады.
Айта кетейік, бүгінде Түркістан облысында 101 405 мүгедектігі бар азамат тіркеуде тұр. Оның ішінде 15 мыңға жуық – балалар мен жасөспірімдер. Арнаулы әлеуметтік қызметтермен 6 736 адам қамтылған.
