Қаржы вице-министрі Ержан Біржанов жеке тұлғалардың мобильді аударымдарын тексеруге қатысты жаңа өлшемдерге түсініктеме берді. Бұл талаптар Қазақстанда алдағы апталарда күшіне енеді, деп хабарлайды Qaz365.kz.
Мәжіліс кулуарында сөйлеген Ержан Біржанов ірі көлемдегі қаражаттың жеке шоттарға түсуі үшін автоматты түрде айыппұл салынбайтынын немесе санкция қолданылмайтынын атап өтті.
– Біз бұған дейін де айтқанбыз, бірден ешқандай айыппұл салынбайды. Алдымен салық органдары азаматқа хабарлама жолдап, түсініктеме сұрайды, – деді вице-министр.
Оның айтуынша, егер азамат хабарлама алғаннан кейін жеке кәсіпкер ретінде тіркеліп, салық мәселесін өз еркімен реттесе, қосымша шаралар қолданылмайды. Ал ескертуге жауап берілмеген жағдайда, салық органдары тексеріс бастауға құқылы болады.
– Тек тексеріс аясында, құжаттарды талдау нәтижесінде ғана салық есептеледі. Ал салық төленбеген жағдайда ғана материалдар сот орындаушыларына жолданады, – деп нақтылады ол.
Сонымен қатар вице-министр туыстар арасындағы аударымдар үшін ешқандай жаза қарастырылмағанын ерекше атап өтті.
– Мысалы, бауырыңыз немесе әпкеңіз 100 мың теңге немесе одан да көп сома аударса, бұл үшін ешқандай шара қолданылмайды, – деді Ержан Біржанов.
Бұған дейін Мемлекеттік кірістер комитеті тексеру тек үш шарт бір мезгілде орындалған жағдайда ғана жүргізілетінін хабарлаған:
– аударымдар 100 және одан көп түрлі жіберушіден түсуі тиіс;
– қаражат кемінде үш ай қатарынан түсуі қажет;
– жалпы сома 12 ең төменгі жалақыдан, яғни 1 020 000 теңгеден асуы керек.
Қаржы министрлігі қазақстандықтарды дүрбелеңге берілмеуге және тек ресми мемлекеттік органдардың түсіндірмелеріне ғана сүйенуге шақырды.
