2025 жылы теңгедегі депозиттер валюталық жинақтарға қарағанда әлдеқайда жоғары табыс әкелді. Сарапшылардың бағалауынша, 2026 жылы да бұл үрдіс сақталады. Экономистер қазіргі макроэкономикалық жағдайда теңге қаражат сақтаудың ұтымды құралы болып қала беретінін, ал доллардың рөлі негізінен қорғаныш тетігімен шектелетінін айтады, деп хабарлайды Qaz365.kz.
Бұл туралы депозит нарығындағы өткен жылдың қорытындысын шығарған қоғам қайраткері әрі экономист Айбар Олжай мәлімдеді. Оның айтуынша, 2025 жылы қаражатын теңгеде сақтаған салымшылар бірнеше көрсеткіш бойынша ұтқан.
– 2025 жылдың қорытындысы бойынша теңге долларға шаққанда шамамен 3,75 пайызға нығайды. Бұған теңгедегі депозиттердің орташа 17 пайыздық табысын қоссақ, таза кіріс 20 пайыздан асты, – деді Айбар Олжай.
Экономистің сөзінше, осы кезеңде долларлық депозиттердің тиімділігі өте төмен болды. Валюталық салымдардың табыстылығы шамамен 1 пайыз деңгейінде қалып, айтарлықтай пайда әкелмеген.
– Долларлық депозиттердің табысы бір пайыз шамасында ғана. Сондықтан Қазақстанда бүгінгі таңда депозитті долларда ұстау тиімді емес, – деп атап өтті ол.
Айбар Олжай долларды көбіне ықтимал девальвация жағдайына сақтандыру құралы ретінде таңдайтынын, алайда 2025 жылы мұндай үрдістер байқалмағанын айтты. Оның пікірінше, 2026 жылы да жағдай тұрақты болады.
– 2025 жылы девальвацияға қатысты ешқандай белгі болған жоқ. 2026 жылы да бұл ахуал жалғасады деп ойлаймын, – деді экономист.
Осыған ұқсас пікірді экономист Расул Рысмамбетов те білдірді. Оның айтуынша, теңге мен доллардың қазіргі бағамы табыс пен тәуекелді теңестіретін депозиттік стратегия құруға мүмкіндік береді.
– Қазіргі жағдайда депозиттердің шамамен 60 пайызын теңгеде, 40 пайызын долларда ұстауға болады. Бұл құрылымда доллар теңгенің күрт әлсіреуінен сақтандыратын хедж рөлін атқарады, – деді ол.
Экономист теңгедегі салымдардың басты артықшылығы жоғары пайыздық мөлшерлемелер екенін атап өтті. Макроэкономикалық тұрақтылық сақталған жағдайда бұл нақты табыс табуға жол ашады.
– Қазір теңгедегі депозиттердің пайыздары өте жақсы. Тұрақты экономика жағдайында бұл жақсы табыс әкеледі, – деді Расул Рысмамбетов.
Сонымен қатар ол салымшыларды күрделі инвестициялық құралдарға асығыс көшуден сақтандырды. Экономистің айтуынша, бағалы қағаздарға инвестиция салу терең білім мен тәжірибені талап етеді, ал тұрақсыз кезеңде тіпті кәсіби мамандардың өзі нарықты дәл болжай алмайды.
Сарапшылардың ортақ пікірінше, 2026 жылы көпшілік үшін ең тиімді әрі қауіпсіз стратегия – жоғары табысты теңгелік депозиттерді таңдап, қажет болған жағдайда валюталық бөлікті тәуекелден сақтану құралы ретінде ғана пайдалану.
