Қазақстандағы орташа жалақы 2025 жылдың төртінші тоқсанының қорытындысы бойынша 473 158 теңгеге жетті. Бұл — бақылау жүргізілген барлық уақыттағы рекордтық көрсеткіш. Ал бүкіл 2025 жылдың қорытындысы бойынша орташа айлық жалақы 441 998 теңгені құрады, бұл да тарихи максимум болып тіркелді, деп хабарлайды Qaz365.kz.
Ұлттық статистика бюросының мәліметінше, 2025 жылдың төртінші тоқсанында елдегі жалдамалы жұмысшылардың нақты саны 3,8 млн адамды құрады. Үш ай ішінде оларға 5,4 трлн теңге төленген. Нәтижесінде орташа айлық номиналды жалақы бір тоқсанда 10,2%-ға өсті. Мұндай күрт өсімнің ықтимал себебі — жыл соңындағы сыйлықақылар мен мерекелік төлемдер.
Бүкіл 2025 жыл ішінде қазақстандық жұмысшыларға 20,2 трлн теңге төленді. 2024 жылмен салыстырғанда орташа жалақы 9,8%-ға өскен.
Айта кететін жайт, орташа жалақы әр жұмысшының табысын көрсетпейді. Бұл көрсеткіш барлық жалдамалы жұмысшылардың жалақыларының жалпы сомасын (қосымша ақылар, үстемеақылар, сыйлықақылар, салықтар мен әлеуметтік төлемдерді қоса алғанда) олардың санына бөлу арқылы есептеледі. Сондай-ақ, есепке кәсіпкерлікпен айналысатын шағын кәсіпорындар қызметкерлерінің жалақысы кірмейді. Сондықтан кейбір жұмысшылар үшін нақты табыс орташа көрсеткіштен жоғары, ал басқалары үшін төмен болуы мүмкін.
2025 жылдың төртінші тоқсанында орташа жалақы дәстүрлі түрде табысы жоғары салалар шоғырланған өңірлерде қатты өскен. Көш басында Астана қаласы тұр — 659 610 теңге. Одан кейін Маңғыстау облысы — 658 762 теңге және Ұлытау облысы — 648 620 теңге орналасқан.
Алматыда орташа жалақы 601 126 теңгені, ал Шымкентте 364 034 теңгені құрады.
Ең төменгі көрсеткіштер Жетісу облысында — 349 593 теңге, Жамбыл облысында — 335 794 теңге және Түркістан облысында — 324 229 теңге болып тіркелді. Дегенмен, тоқсан ішінде орташа жалақының өсімі еліміздің барлық өңірлерінде байқалды.
Экономикалық қызметтің негізгі түрлері арасында ең жоғары орташа жалақы қаржы және сақтандыру саласында тіркелді — 987 485 теңге. Екінші орында тау-кен өндіру өнеркәсібі мен карьерлерді қазу саласы тұр — 978 962 теңге. Үшінші орынды ақпарат және байланыс саласы иеленді — 883 520 теңге.
Ең төменгі жалақы балық шаруашылығы саласында тіркелді — 166 066 теңге. Жалпы ауыл, орман және балық шаруашылығында орташа жалақы 374 053 теңгені құрады. Статистика мәліметтері бойынша, тоқсан ішінде көрсеткіш экономикалық қызметтің барлық түрлерінде өскен.
Орташа жалақыдан бөлек, Қазақстанда тоқсан сайын медианалық жалақы есептеледі. Ол табыс деңгейі бойынша қатардың дәл ортасында тұрған жұмысшының табысын көрсетеді: жұмысшылардың жартысы осы сомадан аз, ал жартысы көп алады.
2025 жылдың төртінші тоқсанында Қазақстандағы медианалық жалақы 339 912 теңгені құрады.
Бұған дейін елде базалық шегерімнің өскені, соның арқасында жұмысшылардың бір бөлігінің қолына алатын ақшасы көбейгені хабарланған болатын. Сонымен қатар, қазақстандық компаниялардың жалақыны қаншалықты белсенді көтеріп жатқаны және қашықтан жұмыс істейтін қызметкерлерге қандай сомалар ұсынатыны белгілі болды.
