Ол Арқалық қаласындағы қылмыстық топтың белді мүшесі болған
13 жылдан астам уақыт бойы жасырынған қылмыскер Жамбыл облысының ауылдарының бірінде ұсталды, деп хабарлайды Qaz365.kz тілшісі Polisia.kz-ке сілтеме жасап.
2011 жылы Арқалық қаласы маңында бір тоннадан астам марихуана тасымалдаған қылмыстық топ ұсталған. Операция барысында сегіз адам қамауға алынғанымен, күдіктілердің бірі жасырынып үлгерген.
“Ағымдағы жылдың қараша айында ІІМ криминалдық полиция департаментінің қызметкерлеріне іздеуде жүрген адамның Жамбыл облысының ауылдарының бірінде екендігі туралы жедел ақпарат келіп түсті. Жүргізілген жедел–іздестіру іс-шараларының нәтижесінде күдікті ұсталып, уақытша ұстау изоляторына қамалды”, – делінген Полиция басқармасының хабарламасында.
Іздеу жұмыстарын тоқтатпаған тәртіп сақшылары қаскүнемді 13 жылдан кейін құрықтап отыр. Қылмыстың өтеуі – жаза. Одан ешкім де қашып құтылмақ емес.
