Тергеу "Ұрып-соғу" бабы бойынша жүргізілуде
Қостанайда жедел жәрдем қызметкері науқастың жақындарының шабуылына ұшырап, ауруханаға түсті, деп хабарлайды Qaz365.kz.
Бұл жөнінде Облыстық полиция басқармасы мәлімдеді.
“Мен сол түні түнгі ауысымға түскен едім. Жедел жәрдемге “Демікпе, жүрек” деп шақыртуы түсті. Шақырту бойынша барып, алғашқы көмек көрсеттік. Алайда науқастың жақындары бір нәрсені дұрыс істемесе, қарғап, түрмеге отырғызатындарын айтты. Науқастың демі тоқтаған соң реанимациялық шараларға кірісіп, 30 минуттай аман алып қалу үшін күрестік. Алайда науқас көз жұмған екен. Біз қолымыздан келгеннің бәрін жасадық”, – дейді жедел жәрдем фельдшері Анель Баймурзина.
Науқас көз жұмғанын естіген жақындары фельдшерге бірден тап беріп, ауыр соққыдан ол бас жарақатын алған.
“Осы факті бойынша қылмыстық іс қозғалды. Алғашқы медициналық көмек көрсету кезінде жедел жәрдем шақыртқандар мен медицина қызметкерлері арасында сөзге келіспеушілік болғаны анықталды. Оның барысында 41 және 51 жастағы екі әйел фельдшерге дене жарақатын салды.Сот-медициналық сараптама тағайындалды”, – делінген полиция мәлімдемесінде.
Тергеу "Ұрып-соғу" бабы бойынша жүргізілуде. Оқиғаның толық мән-жайы анықталуда.
Leave a comment
