Қазір қаралы отбасы көмекке зәру
Қайғылы оқиға 31 желтоқсанда болған, деп хабарлайды Qaz365.kz.
31 желтоқсанда таңертең екіқабатты жер үйде газ-ауа қоспасынан от шығып, жарылыс болған. Ол үйде Бекпаевтар отбасы – күйеуі, әйелі мен төрт баласы тұрған. Өкінішке қарай үй мен ішіндегі дүние мүлік түк қалмай өртеніп, үй ішіндегілерінің бәрі жансақтау бөліміне түскен. Үйдің отағасы мен әйелінің денесі 98 пайызға күйіп кеткен. Дәрігерлердің қаншама күш салғанына қарамастан, Ерлан Бекпаев есін жимай, жүріп кеткен. Ал әйелі Дәния аса ауыр жағдайда жатыр.
Қазір қаралы отбасы көмекке зәру. Әлеуметтік желіде Ерланның анасының зарын айтқан видеосы тарады.
«Үйімде үлкен апат, қайғы болды. Арыстай ұлымнан айырылдым. Төрт немерем, келінім аппаратта, реанимацияда жатыр. Бәрі күйіп, жүре алмай жатыр. Құзырлы органдардан, әкімнен, не газда істейтіндерден бір адам келіп, хәл сұраған жоқ. Көрші-қолаң, ағайын-туыс бәрі көмектесіп, бәрі шулап жатқанда неге келмейді олар? Неге келіп көңіл айтып, білмейді? Қандай тасжүрек адамдар? Мынау сұмдық қой. Шақырды. «Газдың иісі шығып тұр» деді. Ешқандай үндемей кетіп қалған. Қайда барамыз? Не айтамыз? Төрт баласы аман болып, келінім аман шықса болды», – дейді егде ана.
