Қазір аталған факт бойынша тексеру амалдары жүргізіліп жатыр
Заңға сәйкес бір қылмыстық іс бойынша ұсталған күдіктілер бір камерада отырмауы керек. Бұл ереже Шерзат Болаттың ісінде неге сақталмаған? Бұл сұрақты журналистер Шерзат Болаттың туған-туыстарының мүддесін қорғайтын адвокаттардан сұрады деп хабарлайды Qaz365.kz.
«Біз Алматы облысы полиция департаментіне осыған байланысты сұрау жолдадық. Онда біз күдіктілердің бәрі қай жерде отырғанын, қай мекеменің қандай изоляторында отырғанын білгіміз келеді. Иә, әлбетте заң бойынша және №95 бұйрыққа сәйкес, бір қылмыстық іске байланысты күдіктілер бір камерада отырмауы керек. Біз кеше видеода ұялы телефонды күдіктілер емін-еркін ұстап отырғанын көріп отырмыз. Демек, олар бір изоляторда отырып, бір-бірінің камерасында жүруі мүмкін. Қазір аталған факт бойынша тексеру амалдары жүргізіліп жатыр. Нәтижесін кейін білеміз, - дейді адвокат Ерлан Адаев.
Шерзат Болаттың адвокаттары күдіктілерді бір камерада отыруға мүмкіндік берген түрме басшылығының әрекетінде қылмыстық құрам бар деп санайды.
