Ата-анасы ұлдарын аман-есен көруді армандап, күдерін үзбей отыр
Түркістан облысының тұрғыны, 26 жастағы Сүндет Пернебек үш айдан бері із-түзсіз жоқ. Ол нәпақа табу үшін Ресейге аттанғанымен, қаңтардың ортасынан бері байланысқа шықпаған. Жігіттің ата-анасы соңғы рет ұлдарының "Дұғада болыңдар" деп жазғанын айтып, уайымнан әбден титықтаған, деп хабарлайды Qaz365.kz.
Анасы Айнұр Тасболатованың айтуынша, Сүндет алты ай бойы тұрақты түрде хабарласып тұрған. Алайда 13 қаңтарда "сеть жоқ жаққа кетіп барамын, уайымдамаңыздар" деген соңғы хабарламасынан кейін мүлде байланыс үзілген.
"Ресейдің Мәскеуге жақын бір жерінде жүрмін деді. Жұмыс істеп, ақша тауып, үйленуге, менің несиемді жабуға көмектесемін деп кеткен. Бірақ соңғы хабарынан кейін үш ай өтті – не тірі, не өлі екенін білмейміз", – дейді көз жасын көл еткен анасы.
Ауылдағылар да Сүндеттің жайсаң мінезді, аңғал жігіт екенін айтады. Туыстары "оны біреулер арбап, алаяқтардың торына түсіп қалды ма?" деп алаңдайды.
Анасы: "Соғысқа әкетіп қалды ма деп қорқамын"
Сүндеттің жақындары оның алданып қалуы немесе күштеп ұсталып отыруы мүмкін деп топшылайды.
"Телефонын, құжаттарын алып қойды ма екен, әлде соғысқа жіберіп жіберді ме? Білмеймін, уайымым көп. Неге үш айдан бері хабарласпайды?" – дейді анасы.
Ата-анасы барлық тиісті мекемелерге арызданған. Қазақстанның Сыртқы істер министрлігі бұл мәселемен айналысып жатқанын мәлімдеді:
"Сүндет Пернебектің жоғалуына байланысты 18 ақпанда Ресейдің Сыртқы істер министрлігіне ресми сұрау жіберілді. 13 наурызда Қазақстанның Ішкі істер министрлігі де Ресейдің ІІМ-не іздестіру туралы өтініш жолдады. Қазіргі таңда елшілік бұл істі бақылауға алып, туыстарымен тұрақты байланыста", – делінген министрліктің жауабында.
Ал Қазақстанның Еңбек және халықты әлеуметтік қорғау министрлігі 2024 жылдан бері 12 мыңнан астам отандасымыз шетелге кеткенін айтады. Олардың басым бөлігі жұмыс іздеп, білім алып, емделуге аттанған. Бірақ Ресейде мигранттар үшін жағдай күрделеніп барады.
Сүндеттің ата-анасы ұлдарын аман-есен көруді армандап, күдерін үзбей отыр.
"Жанымызды шүберекке түйіп отырмыз. Тек бір хабар берсе екен..." - дейді шарасыз ана.
