Шу аудандық ауруханасында жүкті әйелдің қайтыс болу фактісі бойынша тексеру басталды
Жамбыл облысы Шу ауданындағы ана өлімі фактісі бойынша денсаулық сақтау министрлігінің бақылау комитеті тәуелсіз сарапшылармен тексеріс бастады, деп хабарлайды Qaz365.kz.
"Тексеріс кезінде Шу ауданаралық орталық ауруханасының бас дәрігері мен перзентхана бөлімшесінің меңгерушісі лауазымдарынан шеттетілді. Жамбыл облысы денсаулық сақтау басқармасы басшысының міндетін атқарушы тәртіптік жауапкершілікке тартылып,қатаң сөгіс жарияланды", – делінген Денсаулық сақтау министрлігінің хабарламасында.
Медициналық көмек көрсетудің стандарттары мен қағидаларын бұзуға жол берген басқа адамдарға қатысты да жұмыстан шығаруға дейінгі тәртіптік сипаттағы шаралар қабылданады, деп хабарлады министрліктегілер.
Бұдан бөлек денсаулық сақтау министрі Жамбыл облысының әкімімен өңірлік босандыру қызметі жұмысының сапасын жақсарту жөніндегі іс-қимыл жоспарын талқылаған.
Айта кетейік, наурызда Шу аудандық ауруханасында 25 жастағы әйел комаға түсіп, іштегі баласы шетінеп кеткен. Кейін өзі де қайтыс болды. Марқұмның туыстары оның өліміне дәрігерлерді айыптап, тексеріс жүргізуді талап етті. Полиция Қылмыстық кодекстің 317-бабы 3-тармағы "кәсіптік міндеттерін тиісінше орындамау" бойынша іс қозғалғанын хабарлаған болатын.
