Ол салық органдарынан хабарлама алған
Белгілі актер, тележүргізуші Тәуекел Мүслім табыс көздеріне қатысты тексерістерге байланысты әлеуметтік желіде мәлімдеме жасады, деп хабарлайды Qaz365.kz.
«Ассалаумағалейкум! Не дейін, не дейін?! Жағдай былай: Салық органдарынан 2022-2023 жылғы Каспи банктегі 5000 теңгеден жоғары барлық түскен, аударылған ақшаға есеп бер деп келді. Оның өзі 22-23-жылдарға. Әлі 2024-2025-тің есебі бар. Не істейміз?! Бәлкім, Қазақстаннан кетуге тура келетін шығар», – деп жазды актер.
Еске сала кетейік, бұған дейін Мемлекеттік кірістер комитеті қазақстандық блогерлер 53,3 млрд теңге табысын жасырғанын мәлімдеген болатын. Кейін желіде танымал блогерлердің, инфлюенсерлер мен кәсіпкерлердің тізімі пайда болды. Бұл адамдарға Комитет қосымша салық есептеген.
Мемлекеттік кірістер комитеті блогерлерге қатысты жаппай тексерістердің себебі – азаматтардың шағымдары екенін түсіндірді.
Кейін Мемлекеттік кірістер комитеті 93 блогерге жіберілген, жалпы сомасы 9,8 млрд теңгені құрайтын 169 салықтық қарыз туралы хабарламаны қайтарып алғанын хабарлады. Олардың айтуынша, бұл техникалық ақауларға байланысты орын алған.
