Гүлмира Сатыбалдының тұрғын үй кешенінің құрылысына қатысы бар-жоғын Антикор тексеріп жатыр
Сыбайлас жемқорлыққа қарсы қызметтің ресми өкілі Данияр Биғайдаров "Восточка" тұрғын үй кешенінің құрылысына қатысты істің жаңа мәліметтерімен бөлісті, деп хабарлайды Qaz365.kz.
Атап айтқанда, ол бұл іске Гүлмира Сатыбалдының ықтимал қатыстылығына байланысты тергеу басталғанын растады.
"Агенттік "Восточка" көпфункционалды тұрғын үй кешенінің құрылысы кезінде жасалған заңсыз әрекеттерге байланысты Гүлмира Сатыбалды мен басқа да тұлғаларға қатысты қылмыстық істі тергеп жатыр", - деді Антикордың ресми өкілі Астанада өткен брифингте.
"Восточка" тұрғын үй кешеніне кіретін 24 үйдің құрылысы бойынша эпизод Гүлмира Сатыбалды ісі аясында өткен жылдың маусым айында қаралған болатын. Сол кезде үйлердің "Нұрлы жер" бағдарламасы аясында "Самұрық-Қазынамен" келісімшарт негізінде BAUR Development Group құрамындағы компаниялардың бірі арқылы салынғаны айтылған еді.
Куәгерлердің бірі - Baur Kazakhstan құрылыс компаниялар тобының басшысы Бақыт Кабеновтің айтуынша, жобаға 7,8 миллиард теңге көлеміндегі банктік кепілдікті "ВТБ Банк" берген. Алайда куәгердің сөзіне сенсек, бизнестің екінші иесі Абай Жүнүсов үйқамаққа алынғаннан кейін, Гүлмира Сатыбалды жобаны қаржыландырып келген банкті күтпеген жерден ауыстырған.
