Қанды оқиға “Шұғыла” ықшамауданында болған
Алматыда полиция қызметкері әйелін пышақтап өлтірді. 39 жастағы күдікті Алматы облыстық полиция департаментінде қызмет еткен, деп хабарлайды Qaz365.kz.
Қайғылы оқиға бүгін түскі уақытта “Шұғыла” ықшамауданындағы көпқабатты үйлердің бірінде болған. Полицияға көмек сұраған әйелдің даусын естіген көршілер хабарласқан.
Оқиға орнына жеткен жедел тергеу тобы отбасылық жанжалдан соң, ер адамның әйелін пышақтап тастағанын анықтаған. Жәбірленуші сол жерде тіл тартпай кеткен. Кейін күдікті өз-өзіне қол салмақ болыпты. Яғни, тамағын пышақпен орып жіберген.
Қан-жоса болған күдікті осыдан соң ауруханаға жеткізілген. Қазір ол жансақтау бөлімінде жатыр.
Әйелін пышақтап өлтірген қаскөйдің Алматы облысында жол-патрульдік полиция батальоны құрамында қызмет еткені белгілі.
Ал, 34 жастағы келіншек Ұзынағаш ауылындағы балабақшада директор болған екен.
Екеуінің ортақ некесінен кәмелетке толмаған 3 баласы бар.
Қазір қанды оқиғаға байланысты қылмыстық іс қозғалып, тергеу жүріп жатыр.
