Айыпталушылардан жауап алынды
Талдықорғанда Шерзат Болаттың өліміне қатысты іс бойынша сот отырысы жалғасуда, деп хабарлайды qaz365.kz.
Кезекті отырыста айыпталушылардан жауап алынды. Сот барысында төбелеске бірінші болып қатысқан күдікті Дархан Әскентайдың бейнесі көрсетілді. Сонымен қатар қылмысқа күдікті ретінде танылған оның жауап беру сәті тікелей эфирде көрсетілді.
Бұған дейін Әскентай сотқа дейінгі тергеу кезінде берген жауабымен келіспейтінін және оған қысым көрсетілгенін мәлімдеген еді. Бұл мәлімдемені теріске шығару мақсатында прокурор оның адвокатының қатысуымен өткен жауап алу сәтінің бейнежазбасын көрсетуге өтініш білдірді.
Жазбада тергеуші күдіктіден өзін қалай сезініп тұрғанын және жауап беруге дайын екенін нақтылап сұрайды. Әскентай жауап беруге дайын екенін білдіреді.
Сотта Дархан Әскентай оқиғаның қалай басталғанын тағы бір мәрте айтып, тергеу кезінде өзіне қысым жасалғанын растады.
