Жерде жатқан Ғайыпбаевты тепкенім дұрыс деп ойлаймын - Шерзат сотындағы сотталушы

Шерзат Болаттың өлімі бойынша сотта күдіктілердің бірі Нұрбол Тоқтаубаев жауап берді, деп хабарлайды Qaz365.kz. 

Ол тергеуде берген жауабынан бас тартты. Алғаш тергеуге ілінгеннен бастап полиция пен жедел қызметкерлер азаптағанын, тіпті марқұмның әкесі Қаржаубай Нұрымовтың өзі бөлімшеге келіп, сабап кеткенін мәлімдеді.

Тергеу барысында Тоқтаубаев Абзал Шынасылдың Шерзат Болатты пышақтағанын айтқан. Бірақ сот барысында ол жауабынан бас тартты.

Сот кезінде судья Ержан Жанұзақов сотталушыдан «Нұрқанат Ғайыпбаевты жатқан жерде тептіңіз, өз іс-әрекетіңізді дұрыс деп ойлайсыз ба?» деп сұрақ қойды.

Дұрыс деп ойлаймын. Себебі ол бізге мылтық атты, - деді ол.

Судья одан «сіз Ғайыпбаевты тептіңіз, ал полиция қызметкерлері сізді ұрды. Олардыкі дұрыс емес пе?» деп сұрады.

Аяусыздықпен ұрды ғой (бізді). Ол жерде төбелес орын алды ғой. Біз полиция қызметкерлерімен төбелескен жоқпыз ғой, - деп жауап берді.