Оқиға Сайрам ауданында болған.
Түркістан облысы Сайрам ауданына қарасты Теспа ауылындағы «Нарымбет ата» мектепке дейінгі білім беру мекемесіне тиесілі балабақшада балалардың улану оқиғасы тіркелді, деп хабарлайды Qaz365.kz.
Жүргізілген жоспардан тыс тексеріс барысында мекемеде санитариялық ережелердің сақталмағаны анықталған. Тексеру нәтижесінде тағам қалдықтары мен қызметкерлердің қолынан алынған сынамалардан патогенді микрофлора табылды.
Барлық зардап шеккен балаларға алғашқы медициналық көмек көрсетіліп, кейін үйлеріне жіберілді. Улану себебі – тамақ дайындау ережелерінің бұзылуы, азық-түліктің дұрыс сақталмауы және қызметкерлердің жеке бас гигиенасын елемеуі, – деп мәлімдеді Санитариялық-эпидемиологиялық бақылау департаменті.
Қазіргі таңда оқиға бойынша құқық қорғау органдары қылмыстық іс қозғап, тиісті тергеу амалдарын жүргізіп жатыр.
