Бүгінгі сотта “Land Cruiser” көлігінің бейнетіркегішінен алынған жазба талқылануда
Шерзат ісі бойынша сотта айыпталушылар отырған көліктен алынған бейнежазба көрсетіліп жатыр, деп хабарлайды Qaz365.kz.
Талдықорғанда Шерзат Полатты өлтіру ісі бойынша сот процесі жалғасуда. Сот отырысында Шерзаттың отбасы тарапынан адвокат “Land Cruiser” көлігінің бейнетіркегішінен алынған видеоны ұсынды. Бұл көлікте кейбір айыпталушылар отырған.
Бейнежазбада ер адамдардың дауыстары естіледі — олар күліп, балағат сөздер айтады, кейін басқа көлікке жақындайды. Сол жерде ауызша жанжал басталады, артынан екі көлік бір бағытқа қарай жүріп кетеді. Көлік ішінде айыпталушылармен бірге қыздар да болған.
Шерзаттың адвокаты Мейірман Шекеев күдіктінің бірінен:
“Қыздарды өздеріңізбен күштеп алып жүрдіңіздер ме? Әлде олардың кетіп қалуға мүмкіндігі болды ма?”, – деп сұраған.
Оған айыпталушы Дархан Әскентай:
“Жоқ оларды мәжбүрлеген жоқпыз. Кетіп қалуларына мүмкіндіктері болды. Тек біз өзіміз апарып тастаймыз дедік”, – деп жауап берді.
Сот процесінің 14 бөлімі жалғасып жатыр. Сот отырысын сайтымыздан тікелей эфирден көре аласыздар.
