Ұшақ Меганинагар ауданына жақын орналасқан тұрғын үй секторының үстіне құлаған
“Air India” әуе компаниясының ұшағы Үндістанның Ахмедабад қаласынан Лондонға бағыт алған еді, алайда әуеге көтерілгеннен кейін көп ұзамай апатқа ұшырады. Алдын ала мәлімет бойынша, бортта 240-тан астам адам болған, деп хабарлайды Qaz365.kz тілшісі NDTV-ге сілтеме жасап.
Жолаушылар ұшағы Үндістанның батысындағы Гуджарат штатындағы Ахмедабад әуежайының маңында құлаған.
Ұшақтың Air India компаниясына тиесілі екені және Лондонға бет алғаны нақтыланды. Бортта 232 жолаушы мен 12 экипаж мүшесі барлығы 242 адам болған.
“Air India” компаниясы X әлеуметтік желісінде жариялаған мәліметке сәйкес, ұшақ көтерілген соң бірнеше минуттан кейін қайғылы оқиға орын алған. Әуе компаниясы оқиғаның нақты себептерін анықтап жатыр және кейінірек толық ақпарат беретінін хабарлады. Ұшақ AI171 рейсімен Ахмедабад – Лондон (Гатвик әуежайы) бағытымен ұшқан.
Times of India басылымының жазуынша, апат ұшақ әуеге көтерілгеннен кейін бірнеше минуттан соң болған. Құлаған жерде бірнеше шақырымнан көрінетін қою қара түтін көтерілуде.
Ұшақ Меганинагар ауданына жақын орналасқан тұрғын үй секторының үстіне құлаған. Апат орнына баратын жолдар уақытша жабылған.
