Жолда салынуы керек тиісті жол белгілері мен сызықтар болмаған
Сәтбаев қаласында жол-көлік оқиғасы салдарынан 13 жастағы қыз оқиға орнында қаза болды, деп хабарлайды Qaz365.kz.
Бұл туралы Сәтбаев қалалық полиция департаменті мәлімдеді.
Оқиға 16-маусым күні16:00 шамасында, Ұлытау көшесінде болған. Мәліметтерге сәйкес, қыз бала алған жарақатынан оқиға орнында көз жұмған.
“Көлік жүргізушісі ұсталып, уақытша ұстау изоляторына қамалды. Қазіргі уақытта аталған дерек бойынша тергеу жүргізілуде. Оқиғаның барлық мән-жайы анықталып жатыр. Тергеу облыстық полиция басшылығының бақылауында», — делінген хабарламада.
Полиция департаментінің мәліметінше, жолда тиісті жол белгілері мен сызықтардың болмауы апаттың туындауына ықпал етуі мүмкін. Осы себепті Сәтбаев қаласы әкімінің орынбасары әкімшілік жауапкершілікке тартылған. Бұған дейін жергілікті атқарушы органдарға жолға жаяу жүргіншілер жолағын сызу туралы ескерту жасалған.
«Жол жұмыстарын орындау талаптарының сақталмауына байланысты, атап айтқанда, жолда тиісті таңбалардың болмауына байланысты, Сәтбаев қаласы әкімінің орынбасары жауапкершілікке тартылды», – делінген ресми мәлімдемеде.
