Оларға бұл істі жасауға шамамен 20 минут уақыт кеткен
Астанадағы LRT вагонындағы граффити арнайы құралдардың көмегімен толықтай өшірілген, деп хабарлайды Qaz365.kz.
Бұл туралы City Transportation Systems компаниясының баспасөз қызметі мәлімдеді.
Екі күннен кейін вагондар қайтадан жаңа күйге енді. CTS өкілдерінің айтуынша, суреттер вагондарға еш зақым келтірмей жойылған.
«Мұндай жағдайлардың алдын алу шаралары вагондарды жобалау кезеңінде-ақ қарастырылған: бояу құрамында қорғаныс қабаты бар арнайы материалдар қолданылған. Беткі қабат еш зақымдалмай тазартылды, жылжымалы құрамның бастапқы сыртқы келбеті қалпына келтірілді», – деп мәлімдеді CTS.
Айта кетейік, Бұған дейін Нұрсұлтан Назарбаев әуежайындағы станцияда тұрған LRT вагондарына әлдекімдер бояумен сурет салып кеткен еді. Кейіннен вагондарға сурет салғандардың шетелдік суретшілер екені анықталды. Граффити Германиядан келген қонақтардың ісі болып шықты. Шетелдіктер вагондарға өз никнеймдерін – Znodd, Bons және DRM – бейнелеген. Оларға бұл істі жасауға шамамен 20 минут уақыт кеткен.
«Astana Graffiti» қауымдастығының өкілдері бұл әрекетті «көңіл мен адреналин үшін жасалған» дейді. Ешқандай саяси немесе жасырын мағына жоқ. Болжам бойынша, олар қазір Қазақстаннан кетіп қалған.
