Оқиға 2025 жылғы 27 наурызда болған.
Құлсары қаласының тұрғыны бұрынғы жұбайын қатыгездікпен өлтіргені үшін 15 жылға бас бостандығынан айырылды. Бұл туралы Halyqstan-ға сілтеме жасай отырып Qaz365.kz хабарлайды.
Сотта анықталғандай, қайғылы оқиға болған күні бұрынғы ерлі-зайыптылардың арасында хат алмасу барысында жанжал туындаған.
Келіспеушіліктен кейін ер адам жиналмалы пышақты алып, жәбірленуші жұмыс істейтін емханаға барған. Кабинетке кіріп, алдымен әйелдің басынан ұрып, кейін пышақпен екі рет - мойны мен кеуде тұсына соққы жасаған.
Әйел оқиға орнында қайтыс болды. Артында кәмелетке толмаған балалары қалды.
Атырау облысының қылмыстық істер жөніндегі мамандандырылған ауданаралық соты айыпталушыны ҚР ҚК 99-бабы 2-бөлігінің 9 және 15-тармақтары бойынша - «Бұзақылық ниетпен жасалған адам өлтіру» бабы бойынша кінәлі деп таныды.
Ер адамның кінәсін ішінара мойындап, өкінуін ескерген сот оған 15 жыл бас бостандығынан айыру жазасын тағайындады.
Сондай-ақ марқұмның отбасы пайдасына моральдық зиян өндірілді. Өтемақы сомасы жария етілмеді.
