Қанды қылмыс 2025 жылғы 27 наурызда Құлсары қаласында болған.
Атырау облысының қылмыстық істер жөніндегі мамандандырылған ауданаралық сотында бұрынғы әйелін өлтірген күдікті С.-ға қатысты қылмыстық іс қаралды, деп хабарлайды Qaz365.kz
Оған қылмыстық кодекстің 99-бабының 2-бөлігінің 9,15)-тармақтары бойынша (Адам өлтіру, яғни бұзақылық ниетпен, төтенше жағдай кезінде басқа адамды құқыққа қарсы қасақана қазаға ұшырату) айып тағылған.
Қанды қылмыс 2025 жылғы 27 наурызда Құлсары қаласында болған. Айыпталушы бұрынғы әйеліне пышақпен шабуыл жасаған. Қайғылы оқиға болған сәтте әйел қалалық емханада заңгер болып жұмыс істеген. Кабинетте бұрынғы әйелімен қатар оның әріптесі болғанына қарамастан, айыпталушы бірден әйелге жақындап, қолымен басынан ұрған. Әріптесі оларға араша түскен сәтте, сотталушы жиналмалы пышақты қалтасынан шығарған. Жәбірленушінің әріптесі көмекке адамдарды шақыру үшін бөлмеден қашып шыққан. Сол кезде сотталушы пышақпен әйелінің мойнының сол жақ жоғарғы бөлігінің артқы тұсына бір рет, сол жақ көкірек қуысына бір рет соққы жасап, оқиға болған жерден кетіп қалған.
Жәбірленуші есін жимастан оқиға орнында көз жұмған. Сотталушының кінәсі куәлардың жауаптарымен, сараптама қорытындыларымен, оқиға болған жерді қарау хаттамасымен және заттай дәлелдемелермен дәлелденген.
Прокурор сотталушыны тағылған айып бойынша кінәлі деп тануды, оған 15 жыл мерзімге бас бостандығынан айыру жазасын тағайындауды ұсынған. Ал жәбірленуші тарап сотталушыға өмір бойына бас бостандығынан айыру жазасын тағайындауды сұрады.
