Астанада отбасылық жанжал қайғылы жағдаймен аяқталды. Анасын пышақтап өлтірді деген күдікпен қызы ұсталды, деп хабарлайды Qaz365.kz.
Елордада әйелдің зорлық-зомбылық белгілері бар мәйіті табылғаннан кейін қылмыстық іс қозғалды.
Полиция департаментінің мәліметінше, күдікті ретінде марқұмның 30 жастағы қызы ұсталды. Тергеу барысында ана мен қыздың арасында жанжал туындап, оның соңы ұрыс-керіске ұласқаны анықталды.
Сотқа дейінгі тергеу деректеріне сәйкес, ұрыс кезінде қыз анасына пышақ жарақатын салған. Ол жарақат әйелдің өмірін қиды.
Көршілердің айтуынша, марқұм бірнеше күн бойы пәтерде қимылсыз жатқан. Ал күдіктінің қолында әлі бір жасқа толмаған сәбиі бар екені белгілі болды.
Полиция департаментінің баспасөз қызметі хабарлағандай, күдікті уақытша ұстау изоляторына қамалды.
Қазір аталған іс бойынша тергеу жүргізілуде.
