Сот процесі кезінде ол журналиске тілін шығарған
Шымкент қаласы әкімінің орынбасары Руслан Берденовке жасалған қастандық ісін қарау барысында күтпеген жағдай орын алды, деп хабарлайды Qaz365.kz.
Сот процесінде төрағалық етіп отырған судья Әбинұр Қарабаев журналист Ботагөз Омароваға тілін шығарған. Бұл жайтты тілшінің өзі әлеуметтік желідегі парақшасында жариялап, бейнежазбаны бөлісті.
«Менің журналистік тәжірибемде небір жағдай болды. Бірақ судьяның тіл көрсеткенін алғаш рет көруім. Бүгін Шымкент әкімінің бұрынғы орынбасары Руслан Берденовке қатысты процеске қатысып отырғанда, төрағалық етіп отырған судья Қарабаев маған кенеттен тілін көрсетті. Әрине, таңқалдым. Сол сәтті бейнежазбаға түсіріп, сіздерге жария етуді жөн көрдім», – деп жазды Омарова.
Оқиға әлеуметтік желіде қызу талқыға түсіп, заңгерлер де үн қосты. Адвокат Ерлан Ғазымжанов судьяның әрекеті сот әдебіне қайшы екенін атап өтті.
«Судьяның мұндай қылығы – сот беделіне нұқсан келтіру. Бұл үшін оны істен шеттетіп, мәселені сот алқасына шығару қажет», – деді ол.
Еске салсақ, кеше прокурор сотта Шымкент қаласы әкімі Руслан Берденовке оқ атқан Ернар Жиенбайды 11 жыл 3 айға соттауды сұрады.
