Жол-көлік оқиғасы салдарынан 2-7 жас аралығындағы үш бала қаза тапқан.
Абай облысының Үржар ауданында орын алған қайғылы жол апатына қатысты жаңа мәліметтер жарияланды, деп хабарлайды Qaz365.kz.
Облыс әкімдігінің дерегінше, жол-көлік оқиғасы салдарынан 2-7 жас аралығындағы үш бала қаза тапқан. Сонымен бірге 6-9 жас шамасындағы тағы үш бала жарақат алып, қазіргі уақытта дәрігерлердің бақылауында қажетті ем-дом жасап жатыр.
Зардап шеккендер – екі отбасының балалары. Қайтыс болғандардың екеуі Жарма ауданының Жаңғызтөбе ауылынан ата-әжелеріне қонаққа келген болса, біреуі – Үржар ауданының тұрғыны. Ал жарақат алған балалардың екеуі Үржардан, біреуі Жарма ауданынан, - делінген мәліметте.
Әкімдік қаза болған балалардың отбасына жерлеу рәсімін ұйымдастыруға көмек көрсетілетінін, сонымен қатар психологиялық әрі материалдық қолдау берілетінін мәлімдеді.
Оқиға орнына облыс әкімінің орынбасарының жетекшілігімен арнайы жұмыс тобы жіберілген. Жағдай өңір басшылығының жіті бақылауында.
